O conselleiro de Sanidade salienta a contribución deste conxunto de profesionais no avance cara á excelencia do sistema sanitario público galego
Gómez Caamaño destaca a entrega e dedicación dos 160 profesionais que culminan a súa carreira profesional na área sanitaria de Santiago de Compostela e Barbanza
O titular de Sanidade agradece o traballo desempeñado polos profesionais e lembra que o capital humano é o “piar fundamental” do Servizo Galego de Saúde
Santiago de Compostela, 28 de marzo de 2025
O conselleiro de Sanidade, Antonio Gómez Caamaño, participou esta mañá no acto de homenaxe dos 160 profesionais que se xubilan na Área sanitaria de Santiago de Compostela e Barbanza, un evento no que destacou a súa entrega e dedicación á hora de mellorar o sistema sanitario público galego.
Acompañado polo xerente da área sanitaria, Ángel Facio, o titular da carteira sanitaria da Xunta tivo palabras de recoñecemento para uns traballadores e traballadoras que veñen de culminar a súa traxectoria laboral. Un persoal que, segundo destacou o conselleiro, representa “o piar fundamental” do Servizo Galego de Saúde.
Gómez Caamaño salientou a pegada deixada por estes profesionais nos seus respectivos centros sanitarios pois, o seu labor, contribuíu no avance da sanidade galega cara á excelencia.
No acto tamén participaron a presidenta da xunta de persoal, Ana Riveiro e o neurólogo do Hospital Clínico Universitario de Santiago, Manuel Arias, quen falou en representación dos profesionais xubilados.
Imaxes relacionadas
