Lugo, 8 de abril de 2025

A conselleira do Medio Rural, María José Gómez, acompañada polo delegado territorial da Xunta en Lugo, Javier Arias, recibiu esta mañá a visita dunha delegación de empresarios de Indonesia. Na súa xuntanza, a titular do departamento puido coñecer os diferentes proxectos empresariais que se están a impulsar neste país asiático a prol do seu sector primario.

Posteriormente, a delegación indonesia visitou o Centro de Formación e Experimentación Agraria de Sergude, no concello de Boqueixón, onde puido coñecer a oferta formativa da Consellería vencellada coa agricultura e a gandaría, conformada por unha ampla variedade de ciclos medios e superiores.