Santiago de Compostela, 24 de abril de 2025

A Xunta vén de recibir 6 ofertas para a execución das obras que completarán a humanización da travesía de Albarellos, no concello de Monterrei, nas que a Administración autonómica investirá 1,5 millóns de euros.

Con esta actuación, habilitaranse dous treitos de senda peonil na travesía da estrada OU-143, para dar así continuidade ao tramo xa habilitado no ano 2021. Trátase de acadar un itinerario  continuo, accesible e máis seguro, ata sumar algo máis de 1,1km de lonxitude.

O obxectivo é incrementar a seguridade nos desprazamentos a pé dos veciños e tamén dos peregrinos, xa que esta zona coincide co paso da Vía da Prata do Camiño de Santiago.

Ademais, prevese o acondicionamento do firme nesta vía e tras a execución das obras, tramitarase o cambio de titularidade da estrada en favor do Concello.

O proxecto tamén inclúe a humanización da contorna, pois colocaranse novos puntos de luz, plantaranse árbores como carballos e sobreiras e disporanse bancos.

Esta actuación integral dará como resultados un percorrido seguro e sostible para os viandantes e unha área cunha estética renovada e amable, para o desfrute dos veciños e dos visitantes.

A Xunta traballa coa previsión de poder comezar os traballos este mesmo verán, co obxectivo de telos rematados a mediados do próximo ano.