Santiago de Compostela, 7 de maio de 2025

A conselleira de Vivenda e Planificación de Infraestruturas, María Martínez Allegue, subliñou hoxe no Parlamento o compromiso da Xunta co novo CHUAC, que supón o maior investimento que a Administración autonómica está a acometer nunha obra hospitalaria nestes momentos.

Neste senso, Allegue lembrou que o Novo CHUAC superará os 500 millóns de euros nesta actuación “absolutamente prioritaria” para a Xunta co fin de “brindar e blindar” a mellor atención sanitaria na Coruña para os próximos 50 anos. Na actualidade, afirmou, están en execución contratos por máis de 85M€.

Neste senso, destacou a relevancia do CHUAC “como proxecto transformador da Coruña e a súa contorna” e remarcou que o Executivo galego tamén acadou de 60 millóns de euros de financiamento europeo para esta actuación, sendo a única comunidade española en acadalo.

Unha vez rematado, o CHUAC ofrecerá case 260.000 metros cadrados de novos espazos asistenciais, dun 15% máis de camas, un 50% máis para consultas e un 108% máis de postos de urxencias, recordou a conselleira.

Os traballos, como destacou, están en pleno desenvolvemento. Así, citou que se completou o procedemento das expropiacións, baseado no acordo mutuo con todos os afectados, e está en execución a urbanización de Pedralonga, onde se reubicarán as vivendas afectadas.

Ademais, tralo acondicionamento das instalacións en Expocoruña para o traslado de persoal e servizos do Hotel de Pacientes, estase a levar a cabo a demolición deste inmoble,  co obxectivo de dispor dos terreos antes de rematar este ano.

Tamén estase a avanzar na Torre Polivalente, en concreto na escavación en rocha, unha actuación complexa que inclúe voaduras compatibles coa mobilidade.

Iniciáronse as obras dos accesos e o aparcamento provisional xa está en servizo. Allegue lembrou a este respecto o acordo institucional co Concello da Coruña en relación co financiamento dos accesos.

A Xunta traballa ademais para que antes de final de ano, poida estar licitado o contrato de obra da Fase 2, a obra de edificación máis grande do novo CHUAC, cunha estimación próxima aos 400 M€.