Santiago de Compostela, 14 de maio de 2025

O conselleiro de Sanidade, Antonio Gómez Caamaño, xunto coa directora xeral de Recursos Económicos do Servizo Galego de Saúde, Amparo Pousada, informou ao alcalde de Muíños, Plácido Álvarez, de que o Portal de Contratos Públicos da Xunta publica hoxe a licitación das obras de construción do novo centro de saúde do municipio por 1.322.881,83 euros.

Gómez Caamaño explicoulle ao rexedor ourensán que agora as empresas interesadas teñen de prazo ata o vindeiro 9 de xuño para presentar as súas ofertas. Avanzou que a previsión da Consellería é iniciar os traballos do novo centro de saúde este ano, cun prazo de execución de 18 meses.

O conselleiro de Sanidade, acompañado da directora xeral de Recursos Económicos do Servizo Galego de Saúde, Amparo Pousada, e do xerente da área sanitaria de Ourense, Verín e O Barco de Valdeorras, Santiago Camba, amosoulle ao alcalde o deseño do novo centro de saúde de Muíños que terá unha superficie construída de 459,58 metros cadrados, o que supón aumentar en máis do dobre o espazo actual.

O centro de atención primaria contará con 1 consulta de medicina de familia, 1 de enfermería e 1 polivalente. Isto supón, con respecto ao centro actual, contar cunha nova consulta polivalente, ademais doutros espazos como zona de admisión, esperas, despacho de atención ao usuario, aseos, almacén, oficios e sala de xuntas. 

O novo centro de saúde situarase ao lado do campo de fútbol municipal, no núcleo de Mugueimes, e estará próximo á Casa do Concello, á residencia de maiores da Clamadoira ou á farmacia.