Santiago de Compostela, 29 de maio de 2025

A Xunta de Galicia, a Universidade de Santiago de Compostela (USC) e a Universidade de Vigo (UVigo) realizaron este xoves unha comparecencia conxunta na que chamaron a manter o consenso arredor do acordo sobre a titulación de Medicina que foi acadado por unanimidade de todas as universidades galegas no ano 2015. Este acordo demostrouse útil para o alumnado, para unha docencia de calidade e para o interese xeral da Comunidade.

Así o trasladaron os conselleiros de Educación, Ciencia, Universidades e FP, Román Rodríguez, e o de Sanidade, Antonio Gómez Caamaño, xunto cos reitores da USC, Antonio López, e da UVigo, Manuel Reigosa, logo da reunión urxente do Consello de Docencia Clínica celebrada esta mañá.

Tanto a Xunta como as universidades de Santiago e de Vigo coinciden en que calquera cambio no mapa de titulacións debe ser abordado conxuntamente, froito do acordo, como sempre foi, e non de iniciativas unilaterais.

Nese senso, emprazan a novas reunións ao longo do mes de xuño para retomar o acordo coa Universidade da Coruña (UDC) e a manter o espírito de cooperación que sempre caracterizou o Sistema Universitario de Galicia.