Jaén, 3 de xullo de 2025

A directora xeral de Formación e Cualificación para o Emprego, Zeltia Lado, participou esta mañá na mesa redonda La IA aplicada a los procesos de intermediación, dentro das vixésimo terceiras xornadas dos Servizos Universitarios de Emprego, organizadas pola Universidade de Jaén. Durante a súa intervención, Lado destacou a ferramenta de intelixencia artificial EMi -Implantada nas oficinas de emprego de Galicia- como exemplo do bo uso da IA na mellora da intermediación laboral.

A ferramenta EMi axuda a conectar en tempo real a oferta e demanda de emprego, permitindo mellorar a cobertura de vacantes ao adaptar as necesidades do mercado ás competencias das persoas demandantes. Lado tamén subliñou que EMi permite identificar sectores emerxentes e as empresas que están a contratar, optimizando así os procesos de selección e mellorando a empregabiliade.

A directora xeral destacou que a ferramenta xa perfilou as competencias de preto de 63.000 persoas e segue mellorando para ampliar os seus servizos, tanto ás empresas como ás persoas demandantes, co fin de identificar as formacións prioritarias en función das necesidades de cada territorio.