Santiago de Compostela, 18 de xullo de 2025

O conselleiro de Educación, Ciencia, Universidades e Formación Profesional, Román Rodríguez, participou hoxe no acto conmemorativo do 10º aniversario do Centro de Investigación Interdisciplinar en Tecnoloxías Ambientais (CRETUS), pertencente á Universidade de Santiago de Compostela, onde felicitou ao seu equipo polo seu traballo e compromiso cun modelo de ciencia avanzada, con vocación aplicada e enfoque multidisciplinar.

“O CRETUS é un exemplo de como combinar talento, excelencia e visión de futuro ao servizo dos grandes retos ambientais que afrontamos como sociedade”, afirmou sobre este centro, un dos máis recentes en acadar a acreditación de excelencia da Xunta de Galicia, o que lle permitiu incorporarse en 2023 á Rede CIGUS.

Ao abeiro deste recoñecemento, o Goberno galego destina ao CRETUS un apoio económico de preto de 1,6 millóns de euros ata 2027, que garante a continuidade da súa actividade científica. Este investimento forma parte dos máis de 3 millóns de euros que a Xunta leva destinando a este centro nos últimos anos, consolidando así o seu respaldo á traxectoria. Neste senso, o conselleiro subliñou que a Xunta está a reforzar a Rede CIGUS cun aumento do orzamento do 31%, ata acadar os 23,6 millóns de euros “porque cremos nunha Galicia que aposta pola ciencia e pola transferencia de coñecemento como motor de desenvolvemento”.

Durante o acto, presentouse a estrutura científica do centro, que organiza o seu traballo arredor de oito liñas de I+D: remediación e uso sustentable do chan, tratamento e recuperación de augas, valorización de residuos, bioindicadores, integración de datos e modelado, monitorización fisicoquímica, procesos sustentables e impacto socioeconómico e ambiental. Trátase dun enfoque integrador que combina ciencias experimentais, sociais e da enxeñaría cun triplo obxectivo: diagnóstico, desenvolvemento tecnolóxico e medición do impacto.

Apoio do programa Oportunius

O CRETUS conta actualmente con 107 investigadores, dos cales o 56% son mulleres e o 12% persoal internacional. Entre eles figuran dous beneficiarios de proxectos do Consello Europeo de Investigación (ERC), apoiados a través do programa Oportunius da Axencia Galega de Innovación da Xunta. O centro traballa en proxectos europeos punteiros como EQUALSEA, sobre adaptación transformadora ante desigualdades oceánicas, ou BIORECER, centrado na trazabilidade e sustentabilidade dos recursos biolóxicos.

No acto de conmemoración, Román Rodríguez tamén puxo en valor o apoio da Xunta á investigación excelente na Universidade de Santiago, que conta cun financiamento superior aos 12,7 millóns de euros para os seus cinco centros acreditados na Rede CIGUS, o que supón un incremento do 17% respecto ao período anterior.