As Neves (Pontevedra), 25 de xullo de 2025

O director da Axencia Galega de Calidade Alimentaria da Consellería do Medio Rural, Martín Alemparte, participou hoxe na XIX Festa do Tinto Rías Baixas, que se está a celebrar estes días no concello pontevedrés das Neves, pertencente á comarca do Condado do Tea, unha das subzonas que integran a Denominación de Orixe (DO) Rías Baixas.

Neste evento, que combina gastronomía e produtos vitivinícolas co obxectivo de promocionar os viños tintos de calidade elaborados na zona, o director puxo en valor a súa importancia tanto no desenvolvemento económico da comarca como na proxección dos produtos galegos, dentro e fóra das nosas fronteiras.