Valdoviño (A Coruña), 26 de agosto de 2025

A delegada territorial da Xunta en Ferrol, Martina Aneiros, visitou esta mañá no marco do campionato de surf Abanca Pantín Classic Galicia Pro 2025 que se celebra na praia de Pantín, unha nova edición do mercado de segunda man O Tinglado a través do que a Consellería de Medio Ambiente e Cambio Climático promove o consumo sostible de produtos relacionados con este deporte.

Durante a visita, na que Aneiros puido presenciar o desenvolvemento dun obradoiro de arte crebeira -obras creadas a partir do lixo que chega ás costas- dentro da programación diaria deste espazo, lembrou que o obxectivo da iniciativa é o de avanzar na redución dos residuos que se xeran, cambiar a forma de consumir e apostar por produtos de calidade que duren no tempo.

Así, a delegada territorial animou a adquirir algún dos produtos de segunda man de cidadáns particulares relacionados co surf que están á venda neste espazo como táboas, quillas, cascos, neoprenos e outros materiais vinculados a esta disciplina. Ata o de agora hai rexistrados 40 vendedores, aínda que o prazo de inscrición permanece aberto.