Vigo, 23 de outubro de 2025

A Xunta anima ás empresas galegas a sumarse ao procedemento de acreditación de competencias profesionais impulsado pola Consellería de Educación, Ciencia, FP e Universidades a través do cal se certifica a experiencia adquirida polos traballadores na súa traxectoria laboral.

Así o salientou esta mañá a directora xeral de FP, Eugenia Pérez, que participou no Centro Integrado de FP Valentín Paz Andrade de Vigo, na entrega de certificacións a un total de 179 traballadores de nove empresas do sector naval aos que xa se lles recoñeceu as súas competencias, experiencia e cualificación neste ámbito. En total recoñecéronse neste proceso arredor de mil unidades de competencia profesional de diferentes perfís como soldadores, caldeireiros, tubeiros, mecánicos, especialistas en tratamentos de superficies, andamieiros e delineantes, entre outros.

A responsable do departamento de FP da Consellería de Educación subliñou que o procedemento Ara Empresa é “pioneiro” en Galicia e que, no caso concreto de Vigo, se iniciou nun sector “fundamental” do tecido socio-económico da comarca como é o do naval. Neste senso, agradeceu a implicación e a colaboración da entidade de Pequenos e medianos astaleiros, Pymar, no impulso desta acción, e cuxo secretario xeral, José Francisco Fernández, tamén participou no acto de hoxe no centro de FP Valentín Paz Andrade.

Eugenia Pérez explicou, así mesmo, que, co fin de facilitar o proceso, desde a Administración autonómica dáse a posibilidade de que as acreditacións se fagan de xeito “masivo” por empresas e sectores, en lugar de facelo a nivel individual, o que axiliza moito máis os sistema. Finalmente, salientou a importancia destes procedementos na medida en que benefician aos traballadores e ás empresas ao tempo que se potencia a relación entre os sectores produtivos e os centros de FP.

Plan FPGal360

O procedemento ARA de Avaliación, recoñecemento e acreditación de competencias profesionais, enmarcado nun dos obxectivos do Plan FPGal360, é un procedemento oficial impulsado para recoñecer as competencias que un traballador ten adquiridas a través da experiencia laboral ou da formación non formal. Isto permite que persoas sen titulación oficial poidan acreditar os seus coñecementos e destrezas nun eido profesional concreto obtendo certificados válidos para acceder a formación, emprego ou promoción interna.

En Galicia participan neste proceso un total de 32 centros educativos para recoñecer oficialmente as competencias profesionais en calquera das 25 familias impartidas da comunidade autónoma.