Santiago de Compostela, 18 de novembro de 2025

A Axencia de Doazón de Órganos e Sangue (ADOS) achega hoxe, martes, 18 de novembro, a campaña “Este curso, non perdas este bus” ata campus de Lugo. Unha unidade móbil da Axencia estará estacionada hoxe no aparcadoiro ao carón da entrada principal da Facultade de Formación do Profesorado.

A Axencia convida a todos os membros da comunidade universitaria do campus de Lugo a participar activamente doando sangue na súa unidade móbil, que ofrece un amplo horario de atención: das 09:30 ás 14:30 e das 15:30 ás 21:00 horas.

Ademais, ao longo da presente xornada, a ADOS instalará unha montaxe situada na diante da Facultade de Formación do Profesorado, consistente nunha parada de bus con paneis informativos alusivos ao solidario xesto da doazón de sangue, como os requisitos necesarios para participar. O obxectivo desta iniciativa, que se desenvolve baixo o lema “Este curso, non perdas este bus” e que está percorrendo os sete campus universitarios galegos, pasa por acadar 4.500 doazóns nas Universidades galegas durante o presente curso académico.

Positiva evolución

No transcurso do pasado curso académico a Universidade de Santiago de Compostela acadou un total de 1.553 doazóns de sangue, sendo a universidade galega con maior volume de doazóns de sangue. Ademais, resulta especialmente salientable que, das máis de 1.500 doazóns realizadas na Universidade de Santiago, nos seus dous campus, no pasado curso académico, 458 corresponden a persoas que doaron sangue por vez primeira. Por campus, o de Santiago acadou 1.082 doazóns de sangue e o campus de Lugo obtivo 461.

Lembrar, que no pasado curso académico, os 7 campus galegos rexistraron máis de 4.300 doazóns, das que 1.317 foron realizadas por novos doantes, aproximadamente o 30% do total.

Concienciar e sensibilizar

Durante os meses de setembro a novembro, a ADOS desenvolve a primeira fase da campaña de doazón na Universidade, mentres que a segunda fase abranguerá os meses de febreiro, marzo e abril.

As visitas das unidades móbiles estarán precedidas de charlas informativas destinadas a transmitir aos membros da comunidade universitaria a importancia deste xesto solidario, sensibilizando ao alumnado e promovendo a súa activa participación nas campañas de doazón.

A ADOS fai un chamamento á participación de todos os membros da comunidade universitaria en Galicia que ten amosado, ao longo de máis de tres décadas o seu compromiso co solidario xesto da doazón de sangue.

Para máis información, ADOS dispón do sitio web: https://ados.sergas.gal, as súas redes sociais, e o teléfono gratuíto: 900 100 828, para resolver calquera dúbida relacionada coa doazón de sangue ou coñecer a data dos desprazamentos das unidades móbiles.