Santiago de Compostela, 23 de novembro de 2025

A Consellería de Economía e Industria, en colaboración co Consello Galego de Enxeñeiros Técnicos Industriais, organiza a vindeira semana unha campaña de concienciación sobre a seguridade contra incendios nos polígonos industriais.

A iniciativa contempla a realización dunha rolda de xornadas informativas dirixidas a empresas, organizacións e colexios profesionais que se desenvolverán entre os días 24 e 28 de novembro nos principais parques empresariais de Galicia.

As primeiras celebraranse na provincia da Coruña este luns, en horario de mañá, na Asociación de Empresarios da Grela e para as empresas de Pocomaco; e tamén na provincia de Ourense, coa Asociación de Empresarios de Valdeorras, na Casa Grande de Viloira (O Barco de Valdeorras), para os polígonos de Valdeorras, A Rúa, Vilamartín e Tamallancos.

Proseguirán o día 26 de novembro coa Federación de Comerciantes e Industriais do Morrazo (Fecimo), para os parques empresariais de Barro-Meis, Castiñeiras, O Campiño e Granxa do Bao. Ao día seguinte, celebraranse no edificio multiusos do polígono de Bergondo (A Coruña). Tamén coa Asociación de Empresarios do Deza e empresas de Área 33, Toedo e Botos, no viveiro do polígono Lalín 2000 (Pontevedra); coas asociacións de empresarios das Gándaras e o polígono do Ceao (Lugo); e coa de San Cibrao das Viñas (Ourense), para empresas dese parque empresarial e as de Barreiros e Pereiro de Aguiar. Rematarán o día 28 de novembro no Centro de Promoción Económica do parque empresarial de Bértoa (Carballo), na provincia da Coruña.

Nas xornadas darase a coñecer o novo Regulamento estatal de seguridade contra incendios en establecementos industriais, e abordaranse casos de estudo e estatísticas sobre a incidencia e as características dos incendios proporcionadas pola Fundación Inade e o Instituto Atlántico del Seguro. Ademais, elaboraranse tamén materiais específicos de apoio impresos e dixitais para as actividades.