Santiago de Chile, 23 novembro de 2025

No marco da viaxe institucional a Chile, o secretario xeral da Emigración, Antonio Rodríguez Miranda, participou na celebración do 58º aniversario do Lar Gallego de Chile, unha das entidades máis activas da colectividade galega no país andino, e asistiu ao concerto da artista galega Lucía Pérez con motivo do 75º aniversario do Estadio Español de Las Condes.

Durante o acto do Lar Gallego de Chile, no que tamén se realizaron actuacións dos grupos de gaitas e baile da entidade, Miranda puxo en valor o labor que esta institución vén desenvolvendo desde 1967 na promoción da cultura e da lingua galegas, así como na transmisión do sentimento de pertenza ás novas xeracións. O secretario lembrou que a maioría das actividades desenvólvense dentro das instalacións do Estadio Español que neste ano tamén está na celebración do seu 75º aniversario e no que Galicia tamén participa de maneira activa para agradecer todo este tempo de acollemento.

O responsable da Secretaría Xeral da Emigración destacou que o Lar Gallego de Chile representa o espírito da galeguidade: unha comunidade unida, comprometida e orgullosa das súas raíces que, mesmo a miles de quilómetros, segue facendo país. Miranda agradeceu o esforzo da súa directiva e socios por manter viva a presenza de Galicia en Chile a través de múltiples actividades culturais, formativas e sociais, e reiterou o compromiso da Xunta de Galicia de seguir acompañando a todas as entidades galegas do exterior no seu labor de difusión da nosa identidade e apoio ás persoas emigrantes e retornadas.

O Lar Gallego de Chile mantén ao longo do ano unha intensa actividade que inclúe clases de gaita e baile tradicional, obradoiros de lingua galega, celebracións do Día das Letras Galegas e do Día de Galicia, ademais de encontros gastronómicos e culturais abertos á sociedade chilena. Grazas a este labor constante, a entidade converteuse nun auténtico punto de encontro interxeracional que une á colectividade galega e proxecta cara ao exterior a imaxe dunha Galicia viva, moderna e orgullosa da súa herdanza.

75º aniversario do Estadio Español

O secretario xeral da Emigración, Antonio Rodríguez Miranda, tamén salientou en Santiago de Chile o papel central que o Estadio Español desempeña desde hai décadas como espazo de encontro, acollida e dinamización cultural para a colectividade española, e moi especialmente para a galega. Recordou, ademais, que esta entidade celebra o seu 75º aniversario, unha efeméride na que Galicia participa activamente para recoñecer tanto tempo de hospitalidade, colaboración e acompañamento ás nosas comunidades, segundo expresou.

No marco das actividades que se desenvolven nas instalacións do Estadio Español, Miranda asistiu ao concerto da artista galega Lucía Pérez, que reuniu a numerosos membros da colectividade e público local. O responsable autonómico destacou o labor da cantante como embaixadora da nosa cultura e agradeceu a todas as entidades galegas de Chile o seu traballo constante para manter viva a identidade galega, reforzar os vínculos coa diáspora e proxectar Galicia no conxunto de América Latina.