Pontedeume (A Coruña), 9 de xaneiro de 2026

A Xunta de Galicia acaba de formalizar a adquisición de sete parcelas privadas no Parque Natural Fragas do Eume e traballa xa na compra de máis terreos co fin de seguir reforzando e ampliando a superficie de titularidade pública dentro deste espazo protexido.

A conselleira de Medio Ambiente e Cambio Climático, Ángeles Vázquez, asinou esta mañá en Pontedeume a correspondente escritura de compravenda cos 6 propietarios das fincas, que suman en total 10,97 hectáreas e están localizadas nos concellos de Pontedeume e A Capela.

En total e tendo en conta os seis lotes adquiridos ata o momento a 35 propietarios, o Goberno galego asumiu a propiedade de 103 parcelas privadas neste parque natural, cunha superficie de 120,02 hectáreas e un investimento de 706.870,36 euros.

A maiores, a conselleira avanzou que o seu departamento está a tramitar xa un sétimo lote de parcelas, a través do que se prevé a adquisición de aproximadamente 43 hectáreas adicionais cun investimento reservado de máis de 270.000 euros.

Cómpre lembrar que estas operacións de compra-venda se enmarcan nun programa pioneiro promovido pola Xunta tras a aprobación do Plan de uso e xestión do parque natural no ano 2023 e ten como fin reforzar o peso da superficie pública nun espazo no que o 80% dos terreos son de titularidade privada.

O obxectivo desta iniciativa, que se empezou a materializar en febreiro de 2024 coa compra das primeiras parcelas privadas, é realizar actuacións de conservación e restauración en zonas de máximo interese ecolóxico, eliminando e retirando especies invasoras e mellorando a continuidade das masas de frondosas autóctonas que caracterizan ás Fragas do Eume, un espazo natural protexido que se estende polos concellos de Cabanas, Pontedeume, A Capela, Monfero e As Pontes de García Rodríguez.

De feito, a Xunta considera de vital importancia a realización de actuacións no parque que persigan tanto incrementar a superficie pública de bosques e a súa recuperación como asegurar a conservación da natureza a través do mantemento dos procesos ecolóxicos, a preservación da biodiversidade e a aplicación de medidas que garantan a singularidade da paisaxe e a restauración de recursos naturais degradados.

Neste sentido, cómpre lembrar que o Parque Natural Fragas do Eume, que se atopa nunha zona de marcada influencia oceánica entre o medio litoral do esteiro do Eume e as montañas nas que nace o devandito río, é, a día de hoxe, unha das mostras máis importantes dos bosques sublitorais galegos e un dos poucos bosques atlánticos ben conservados de Europa.