Viveiro (Lugo), 28 de febreiro de 2026

O delegado territorial de Lugo, Javier Arias, participou hoxe na presentación do cartel e a programación da Semana Santa de Viveiro e subliñou o apoio da Xunta de Galicia a “esta manifestación relixiosa e cultural que xera unha importante actividade turística na vila”.

Arias gabou o traballo da Xunta de Confrarías, á que o Goberno galego destina 40.000 euros mediante un convenio. Sinalou que tamén se subscribiron acordos co concello para impulsar o turismo cultural e o deportivo, e que xunto aos fondos para outras iniciativas suman unha achega autonómica de máis de 800.000 euros en accións turísticas no municipio ao longo do ano.

A Semana Santa de Viveiro, declarada Festa de Interese Turístico Internacional, é unha das celebracións relixiosas máis antigas de Galicia e destaca especialmente polo valor artístico dos pasos procesionais.