Santiago de Compostela, 27 de marzo de 2026

A conselleira do Medio Rural, María José Gómez, esixiu hoxe ao Ministerio de Agricultura, Pesca e Alimentación (MAPA) un maior compromiso a prol do sector lácteo e tamén que mellore a Lei estatal da cadea alimentaria para introducir nela os umbrais que acrediten os custos de produción e asegurar así que os contratos cumpran coa normativa e non se fixe o prezo aos gandeiros por debaixo destes custos.

A titular de Medio Rural fixo estas demandas ao propio ministro Luis Planas, no marco das reunións da Conferencia Sectorial de Agricultura e Desenvolvemento Rural e dos Consellos Consultivos de Política Agrícola e Política Pesqueira para Asuntos Comunitarios, nas que participou por videoconferencia.

Así, Gómez reclamou ao ministro unha maior implicación para facer fronte á situación actual do sector lácteo, marcada polo incremento dos custos de produción e pola redución do prezo nos contratos, cuestións que dificultan a viabilidade das explotacións. Pediulle que sexa “contundente” diante de baixadas tan pronunciadas da industria aos gandeiros que supoñen case o 20 % con respecto aos vixentes ata o de agora e volveu denunciar a “deslealdade” da industria nesta cuestión.

Concretar os custos de produción

En particular, a conselleira instou ao MAPA a modificar a devandita Lei estatal da cadea no sentido de concretar os rangos dos custos de produción dos gandeiros e reiterou que para iso pode mesmo aproveitar a aplicación informática desenvolta desde Galicia (a Conta Láctea), de forma que sirva como medio de proba. 

Trátase de fixar eses umbrais para evitar a venda a perdas, de forma que o prezo cubra efectivamente os custos de produción máis unha marxe de beneficio, como ocorre en calquera outra actividade económica, subliñou Gómez, quen lembrou que a Xunta levaba xa tempo demandando unha reunión urxente co ministro para tratar este e outros temas de interese para o sector, sen obter resposta algunha, algo que lamentou.

Na mesma liña, a titular de Medio Rural volveu insistir na necesidade de que a Agencia de Información y Control Alimentarios (AICA), adscrita ao MAPA, actúe neste eido de xeito contundente e, de ser o caso, tamén a Comisión Nacional do Mercado e a Competencia. Lembrou que a Xunta, pola súa parte, estanse reforzando os controis para verificar que se cumpre a lexislación na sinatura dos contratos e para vixiar que leite está entrando doutros países europeos e como se vende despois nos lineais.

Así mesmo, Gómez puxo en valor a rolda de contactos que está a manter a Consellería con todos os axentes do sector nas últimas semanas, co fin de propiciar un entendemento entre eles en favor do equilibrio na cadea de valor do leite e da sustentabilidade deste eido produtivo clave do rural galego.

A conselleira reiterou que a Xunta está, nesta tesitura, do lado dos gandeiros, como se pon de manifesto a través de todas estas actuacións e tamén coa recente convocatoria dunha das maiores liñas de axudas para favorecer a remuda xeracional, dotada con 53 millóns de euros para a incorporación de mozos e para os plans de mellora asociados.

Dermatose nodular contaxiosa

Sobre a dermatose nodular contaxiosa, Gómez insistiu na demanda feita ao ministerio, que tamén se trasladou ao comisario de Agricultura da UE, de que se rebaixe a categoría da enfermidade para paliar as consecuencias sobre as explotacións que se poidan ver afectadas e tamén que se desenvolva unha vacina marcada que teña carácter preventivo.

Neste sentido, cómpre lembrar que a Xunta mantén polo de agora prorrogadas as medidas de prevención diante desta doenza, sempre seguindo criterios técnicos sobre a súa evolución epidemiolóxica e dándolle prioridade ao obxectivo de protexer a nosa cabana gandeira.