A Coruña, 1 de abril de 2026

A AC-012 na Coruña reabrirá ao tráfico esta medianoite, tras acometerse estes días a demolición do viaduto. A conselleira de Vivenda e Planificación de Infraestruturas, María Martínez Allegue, xunto coa delegada territorial da Xunta, Belén do Campo, e o xerente da Área Sanitaria da Coruña e Cee, Luis Verde, supervisou hoxe as actuacións realizadas na zona, que obrigaron ao peche da circulación.

Allegue explicou que as actuacións avanzaron con máis axilidade do previsto, tendo xa completada a demolición da parte do viaduto programada para esta semana.

Seguindo a planificación, a operación de derrubamento inciouse o luns coa demolición de parte dos segmentos do viaduto situados nos bordos da AC-012, concentrando as actuacións máis complexas esta semana, o que posibitará a reapertura do tráfico.

Cómpre destacar que se demoleron aproximadamente 4.000 toneladas que se acopiarán provisionalmente, para logo reutilizar este material como recheo dos viarios da propia obra.

A conselleira agradeceu o intenso labor dos profesionais que estiveron a traballar estes días, durante as 24 horas, para axilizar ao máximo as obras e reducir as molestias á cidadanía e as afeccións ao tráfico.

Cómpre lembrar que unha vez acometidos os traballos no tramo 2 (vanos 6,7,8), que é o máis longo e singular do proceso, a programación das obras seguirá nos próximos días, co derrubo dos vanos restantes (1,2,3,4), executándose xa sen afección para o tráfico na avenida da Pasaxe.

En canto se remate a demolición do resto de estrutura, prevista ao longo das vindeiras semanas, avanzarase coa execución do novo viaduto.