O seguimento na quenda de tarde da folga de atención primaria acada o 1,72 % na sanidade pública galega
O paro está convocado polo sindicato CIG, a única forza sindical que non se sumou ata o momento á reforma integral da atención primaria que a Consellería de Sanidade está a negociar xa con seis organizacións sindicais
Santiago de Compostela, 23 de abril de 2026
O seguimento da folga de atención primaria convocada polo sindicato CIG na quenda de tarde deste xoves foi do 1,72 % nos centros sanitarios da comunidade galega.
Por áreas, o seguimento na área sanitaria da Coruña e Cee foi do 0,93 %; na de Ferrol, do 4 %; na de Santiago de Compostela e Barbanza, do 1,54 %; na de Lugo, A Mariña e Monforte de Lemos, do 0,65 %; na de Ourense, Verín e O Barco de Valdeorras, do 1,4 %; na de Pontevedra e O Salnés, do 0,77 %; e na de Vigo, do 2,52 %.
O número total de persoal participante na folga no conxunto das sete áreas sanitarias de Galicia foi de 28 profesionais, dos que 3 son da área sanitaria da Coruña e Cee; 4 da de Santiago de Compostela e Barbanza; 6 da de Ferrol; 1 da de Lugo, A Mariña e Monforte de Lemos; 3 da de Ourense, Verín e O Barco de Valdeorras; 1 da de Pontevedra e O Salnés; e 10 da de Vigo.
O Servizo Galego de Saúde conta na xornada de hoxe coa cobertura do 100 % dos servizos mínimos, garantindo a actividade asistencial urxente e de emerxencias.
A CIG, convocante do paro no día de hoxe de atención primaria, é a única forza sindical que decidiu non sumarse ao acordo para a reforma integral da atención primaria que a Consellería de Sanidade está a negociar xa con seis organizacións sindicais.
