Santiago de Compostela, 22 de maio de 2026

A Xunta, a través do Servizo Galego de Saúde, vén de publicar no Portal de Contratos Públicos a adxudicación por un importe de 1.605.210 euros para o subministro de 30 ecógrafos con destino aos hospitais comarcais da rede sanitaria pública galega.

Concretamente, e atendendo á tipoloxía do equipamento, o primeiro dos lotes dotará con ecógrafos de rehabilitación (4) os centros hospitalarios do Salnés, de Monforte de Lemos, de Barbanza e de Verín. Así mesmo, o Hospital Público da Mariña incorporará un ecógrafo para o seu servizo de reumatoloxía; mentres que o do Salnés e o de Monforte de Lemos disporán dun novo equipo de ecografía nos seus servizos de traumatoloxía. O investimento deste primeiro lote ascende ata os 494.291 euros.

O segundo dos expedientes conta con 4 equipos destinados ao radiodiagnóstico. Así o Hospital Público do Salnés recibira dous destes equipos, mentres que os hospitais de Monforte de Lemos e da Mariña sumarán cadanseu novo equipo. Neste caso, invístense 387.200 euros nestes equipos.

Outros dos servizos hospitalarios que contarán con novos ecógrafos (8) serán os servizos de xinecoloxía e obstetricia. Neste caso, a Xunta adquire 1 novo ecógrafo para o Hospital Público de Monforte de Lemos, 1 para o da Mariña, 1 para o Hospital do Barco de Valdeorras, 2 para o Hospital de Barbanza e 3 para o Hospital do Salnés. A adquisición destes equipos ten un importe de 367.840 €.

O cuarto lote dispón a distribución de 4 novos ecocardiógrafos para os hospitais comarcais do Servizo Galego de Saúde: 1 terá como destino o Hospital Público de Cee, outro o Hospital Público do Salnés e 2 serán para o Hospital  Público de Monforte de Lemos. O seu valor ascende ata os 181.639 €.

Por último, adquírense novos ecógrafos portátiles (6) con destino aos servizos de anestesia e reanimación, pediatría e medicina interna do Hospital de Monforte de Lemos; aos servizos de urxencias e medicina interna do Hospital de Barbanza e aos servizo de urxencias do Hospital do Salnés. Este lote conta cun investimento de 174.240 euros.

Compra inicial de 8 ecógrafos no mes marzo

A subministración destes ecógrafos engádense á compra xa realizada pola Xunta o pasado mes de marzo, na que destinou 519.623 euros para adquirir 8 novos ecógrafos.

En concreto, destinou 353.199 euros para mercar 5 ecógrafos para os servizos de uroloxía: 1 para cada un dos hospitais públicos de Monforte de Lemos, do Salnés e de Barbanza; e 2  para o Hospital Público da Mariña.

Así mesmo, tamén se adquiriron 2 ecógrafos con destino aos servizos de cirurxía xeral e dixestiva dos Hospitais de Verín e de Monforte de Lemos, cun investimento de 145.151 euros; e 1 ecógrafo portátil mercado con destino ao servizo de dermatoloxía do Hospital Público de Barbanza. Neste caso, o Executivo galego destinou unha partida de 21.273 euros.

Gran funcionalidade

A ecografía é un procedemento de diagnóstico por imaxe que permite ver órganos e estruturas brandas dentro do corpo. Mediante este procedemento pódese visualizar calquera parte do corpo identificando con claridade a forma e tamaño de cada estrutura do seu interior.

Por outra banda, estes equipos ofrecen a posibilidade de estudar os distintos tecidos do corpo, como é o caso do fluxo sanguíneo de arterias e veas para detectar arteriosclerose e coágulos; analizar a glándula tiroides e outras estruturas brandas do pescozo; de tendóns, ligamentos, músculos e estruturas das articulacións; das glándulas mamarias ou para o estudo pelviano.

Ademais, actualmente as ecografías pódense combinar con outros procedementos como punción con agullas para biopsia, endoscopios ou outros equipamentos dando lugar a imaxes de fusión.