Madrid, 27 de maio de 2026

O director da Axencia Galega da Calidade Alimentaria, Martín Alemparte, asistiu hoxe á inauguración de WineMad 2026, que se celebra ata o venres no recinto de IFEMA, e onde a Consellería do Medio Rural reforza a promoción dos viños galegos nun mercado estratéxico para o sector vitivinícola cun espazo expositivo propio. En concreto, 22 adegas galegas vinculadas ás distintas denominacións de orixe e indicacións xeográficas protexidas, estarán presentes nesta feira co obxectivo de dar visibilidade e abrir novas oportunidades comerciais para o sector vitivinícola galego.

Nesta edición, e por primeira vez, a Consellería do Medio dispón dun expositor de 210 metros cadrados deseñado como un espazo dinámico, inmersivo e contemporáneo, pensado para favorecer a actividade comercial das adegas participantes e ofrecer unha experiencia atractiva aos profesionais asistentes. Así mesmo, conta con áreas individualizadas para reunións comerciais, zonas de exposición e un espazo destinado á realización de catas e presentacións especializadas.

O programa de actividades inclúe diferentes relatorios e presentacións técnicas arredor das castes autóctonas, da historia vitivinícola galega e da influencia do clima e do solo na personalidade dos viños galegos.

Compromiso coa promoción da calidade alimentaria

O director reiterou o compromiso da Xunta coa promoción da calidade alimentaria en xeral, que se plasma, entre outras medidas, a través do desenvolvemento do Plan Saborea Galicia Calidade Diferenciada, dotado con máis de 10 millóns de euros este ano, dous máis que no 2025. Por medio desta iniciativa apóiase a participación dos produtores galegos en eventos gastronómicos fóra de Galicia e de España e refórzase a promoción en Galicia, con mercados, feiras enoturísticas e gastronómicas e mesmo con accións en centros educativos.

En definitiva, desde o Goberno galego apóstase pola participación en eventos especializados como WineMad nun momento de transformación para o sector vitivinícola. Neste contexto, os viños galegos presentan importantes fortalezas competitivas asociadas á súa diversidade, frescura, singularidade e capacidade para transmitir identidade, territorio, autenticidade e cultura.