Bóveda (Lugo), 5 de xuño de 2026

A conselleira do Medio Rural, María José Gómez,  acompañada pola directora xeral de Planificación e Ordenación Forestal, Luisa Piñeiro, e polo alcalde de Bóveda, José Manuel Arias, participou esta mañá na inauguración dunha nova senda interpretativa para divulgar a cultura forestal no marco do Día Mundial do Medio Ambiente, unha actividade na que participaron ademais estudantes dos CEIP de Bóveda e de Monforte de Lemos.

O itinerario divulgativo atópase no viveiro público dos Trollos, en Bóveda, e a súa posta en marcha forma parte dun plan da Xunta para abrir ao público en xeral este tipo de instalacións que está dotado con arredor de medio millón de euros e que inclúe tamén actuacións no viveiro autonómico de Santa Cruz de Oleiros, na Coruña.

A senda inaugurada hoxe conta con pezas interpretativas realizadas en madeira, que representan a fauna da contorna, e facilítase ademais a observación do hábitat formado polas distintas especies forestais do viveiro, unha instalación de 30 hectáreas de superficie, a maior parte dela ocupada por diversas masas arbóreas, tanto de especies autóctonas como doutras de carácter ornamental.

A conselleira destacou que iniciativas coma esta “favorecen a divulgación da nosa riqueza forestal, que é clave na súa conservación” e subliñou, así mesmo, que se enmarca nos eixos de traballo do Plan Forestal de Galicia referidos á información, divulgación e comunicación sobre o territorio, os recursos e a xestión forestal.

O dos Trollos é un dos oito viveiros forestais dependentes da Consellería do Medio Rural e que na actualidade producen unhas 20.000 plantas de frondosas autóctonas. O departamento autonómico está a realizar melloras estruturais nas súas instalacións e mantemento de hortos e sementeiros, así como produción de sementes de alto valor xenético.