O titular de Sanidade, acompañado do xerente do Servizo Galego de Saúde, participou esta tarde en Compostela no acto oficial organizado polo Colexio Oficial de Médicos da Coruña
Gómez Caamaño dá a benvida aos 246 novos médicos residentes que completarán a súa formación nos centros sanitarios da provincia da Coruña
Desde o 5 de xuño, a área sanitaria da Coruña e Cee conta con 105 facultativos en formación, a de Santiago e Barbanza con 107 e a de Ferrol con 34
A Xunta destina este ano máis de 94 millóns de euros ao financiamento da Formación Sanitaria Especializada, acadando a cifra máis alta da súa historia, con 682 prazas
O Executivo galego reforzou a convocatoria de prazas onde se precisa máis persoal, como é o caso de medicina familiar e comunitaria, a saúde mental ou a enfermería
Santiago de Compostela, 12 de xuño de 2026
O conselleiro de Sanidade, Antonio Gómez Caamaño, e o xerente do Servizo Galego de Saúde, Luis León, participaron esta tarde en Compostela no acto oficial de benvida aos 246 novos MIR que completarán a súa formación médica nos centros sanitarios da provincia da Coruña.
Organizado polo Colexio Oficial de Médicos da Coruña, o titular de Sanidade deu a benvida aos profesionais que se incorporaron ao Servizo Galego Saúde este 5 de xuño. En concreto, trátase de 105 facultativos da área sanitaria da Coruña e Cee, 107 da área de Santiago e Barbanza e 34 da área sanitaria de Ferrol.
O departamento sanitario da Xunta realiza este ano o maior investimento da súa historia para formar aos distintos profesionais sanitarios do futuro, cunha convocatoria de 682 prazas. Así, en 2026 destina unha partida que supera os 94 millóns de euros para financiar o conxunto das categorías da Formación Sanitaria Especializada.
A oferta galega de Formación Sanitaria Especializada incide naquelas que presentan un maior déficit de profesionais, entre as que destacan: medicina familiar e comunitaria, a saúde mental ou a enfermería. Así mesmo, por primeira vez convocáronse 6 prazas da nova especialidade de medicina de urxencias e emerxencias, cuxos profesionais xa se están formando no Servizo Galego de Saúde
O Executivo galego reafirma o seu compromiso co futuro da sanidade pública, acompañando e apoiando aos novos residentes desde o seu primeiro día no Servizo Galego de Saúde.
Imaxes relacionadas
