O Grove (Pontevedra), 17 de xullo de 2026

O conselleiro de Emprego, Comercio e Emigración, José González, acompañado pola directora xeral de Traballo Autónomo e Economía Social, Marta Mariño, participou hoxe na clausura do Encontro da Toxa 2026: Galicia, ante unha nova realidade, onde puxo en valor a estratexia da Xunta de captación de talento en beneficio do emprendemento e o emprego. Destacando este foro que tratou durante dous días conceptos como a internacionalización, a innovación, a sostibilidade, o liderado e a anticipación económica, avogou pola colaboración público-privada para abordar os retos do mercado laboral, como o mantemento dos negocios estratéxicos para cada territorio e a cobertura de vacantes.

Na súa intervención, o conselleiro avogou por acompañar as empresas, as persoas emprendedoras e as autónomas para que sigan xerando riqueza, emprego e dinamismo económico na Comunidade. Nesa liña, referiuse á futura Estratexia de emprendemento ligado ao territorio, que incidirá tanto na creación de novos proxectos como na continuidade dos existentes que forman parte da identidade das vilas e comarcas, tomando como fío condutor a Rede de polos que leva atendido uns 6.800 proxectos no conxunto de Galicia, dos que arredor de 2.000 corresponden á provincia de Pontevedra.

Nese senso, destacou tamén as máis de 150 adhesións á Rede Ultreia para mellorar o acompañamento e o impacto das políticas públicas relacionadas co emprendemento ou os apoios autonómicos que inciden en aspectos claves como a remuda xeracional. Tanto neste capítulo como no da cobertura de vacantes, José González apostou por potenciar a forza laboral interna e, ao mesmo tempo, pola apertura á captación de talento, cun foco prioritario no retorno dos galegos do exterior.

Captación de talento  

O titular de Emprego salientou que Galicia está a desenvolver un modelo propio co foco no retorno da emigración, a través da Estratexia Galicia Retorna, e cun segundo eixe na captación ordenada de talento de terceiros países, especialmente de América Latina. Con ese pano de fondo, aludiu a iniciativas como a última convocatoria do programa Retorna Cualifica Emprego, coa que se agarda que 200 persoas galegas residentes no estranxeiro poidan regresar a Galicia a desenvolver a súa vida e a súa traxectoria profesional.

Segundo apuntou, o modelo autonómico para sumar talento inclúe outras accións como as feiras de emprego que se celebraron o pasado mes de xuño no Brasil, con notable éxito de participación e de cobertura dos postos que ofertaban as empresas participantes. Outro fito clave, engadiu, é a primeira orde para rehabilitar vivendas destinadas a persoas traballadores en concellos de menos de 20.000 habitantes.

O conselleiro enmarcou estas accións nun contexto no que Galicia está a acadar cifras históricas de emprego, co nivel de paro máis baixo de toda a serie histórica no pasado mes de xuño, tamén no caso da provincia de Pontevedra. Concluíu apelando ao Diálogo Social para abordar todos e cada un dos retos do mercado laboral, da man do empresariado e dos representantes das persoas traballadoras.

Cómpre engadir que, tras a clausura do evento, o representante autonómico asistiu ao xantar e ao acto no que fixo entrega do Premio Empresario Galego do Ano 2026 a Antonio Fontenla, presidente da Confederación de Empresarios da Coruña (CEC).