Meaño (Pontevedra), 17 de xullo de 2026

A conselleira do Medio Rural, María José Gómez, participou hoxe na inauguración da XXV Festa do Viño de Meaño, na que amosou o seu apoio ao sector vitivinícola e ás iniciativas que, como este evento, dinamizan a economía das contornas rurais da comunidade. 

Acompañada pola directora xeral de Planificación e Ordenación Forestal, Luisa Piñeiro; e polo director xeral da PAC e do Control da Cadea Alimentaria, Juan José Cerviño; e polo delegado territorial da Xunta en Pontevedra, Pablo Fernández; Gómez destacou na súa intervención a importancia desta festividade como unha celebración que tamén xera cohesión social nestas zonas.  

Así, explicou que o sector vitivinícola é fundamental para xerar emprego e manter vivo o territorio, e puxo en valor a aposta do Goberno galego por apoiar este tipo de iniciativas que contribúen ao desenvolvemento e a dar visibilidade ao rural. Ademais, sinalou que dende a Xunta se seguirá acompañando a profesionais deste sector, ás adegas e a todas aquelas iniciativas que salientan o patrimonio.

Continuou poñendo de relevo o percorrido histórico desta festa e o traballo detrás dela en cada edición. En concreto, este ano participaron 22 adegas do municipio mostrando o seu traballo, compartindo os seu viños, e, como indicou a conselleira, demostrando por que o Val do Salnés é unha das grandes referencias do albariño e da Denominación de Orixe Rías Baixas.

Por último, agradeceu a incorporación dos novos cabaleiros e damas das confrarías do viño, e recoñeceu a todas as persoas que representan ese orgullo por defender a cultura vitivinícola e por impulsar o viño galego.

Axudas ao sector vitivinícola

Cómpre salientar o apoio do Goberno galego ao sector vitivinícola, ao que anualmente se destinan uns 12 millóns de euros a través das axudas para a reestruturación e reconversión de viñedo; de transformación e comercialización de produtos vitivinícolas; de promoción en terceiros países e a liña para a conservación paisaxística e loita contra a erosión nos viñedos da Ribeira Sacra, entre outros apoios.