Santiago de Compostela, 27 de xullo de 2026

O director da Axencia Galega da Calidade Alimentaria da Consellería do Medio Rural, Martín Alemparte, mantivo no día de hoxe unha xuntanza co Consello Regulador da Indicación Xeográfica (IX) de Augardentes e Licores Tradicionais de Galicia. Nesta reunión analizaron o funcionamento deste distintivo e avaliaron novas liñas de colaboración conxuntas para impulsar a incorporación de novos operadores a este selo.

Neste sentido, o encontro serviu para facer unha análise da última edición das Catas de Galicia, celebradas o pasado 14 de xullo, e na que participaron 10 empresas do sector das bebidas espirituosas cun total de 33 mostras.

Alemparte sinalou a importancia destas indicacións xeográficas, que forman parte dos 36 distintivos de calidade diferenciada cos que conta a nosa comunidade, aos que hai que sumarlle a certificación de produción ecolóxica e o selo Artesanía Alimentaria. De xeito concreto, en Galicia existen as IX de Licor Café de Galicia, Licor de Herbas de Galicia, Orujo de Galicia e Augardente de Herbas de Galicia, todas elas moi vencelladas ás tradición e a cultura galega.

A maiores, destacou que este tipo de elaboracións supoñen unha oportunidade para xerar maior valor engadido arredor da produción vitivinícola galega, transformando un produto ligado á uva en bebidas de alta calidade diferenciada que contribúen a diversificar a actividade das adegas, fortalecer o tecido agroalimentario e proxectar a identidade gastronómica de Galicia entro e fóra da comunidade.