As Somozas (A Coruña), 5 de agosto de 2026

A delegada territorial da Xunta en Ferrol, Martina Aneiros, visitou hoxe, xunto ao director territorial da Consellería de Emprego, Comercio e Emigración, Juan José Couce, o Concello das Somozas. Durante a visita, na que estiveron acompañados do alcalde do municipio, Juan Alonso Tembrás, puideron comprobar o traballo que están a desenvolver as catro persoas contratadas, ao abeiro do programa Galicia Suma Talento: Rural Activo.

Tal e como explicou Aneiros, este programa “busca impulsar o emprego no medio rural e reforzar o coidado deste”, xa que as persoas contratadas realizarán tarefas relacionadas, maioritariamente, coa prevención de incendios nas faixas secundarias, como a planificación preventiva, a valorización forestal, a silvicultura, a xestión da biomasa e a limpeza de montes. No caso das Somozas, que recibiu unha axuda de preto de 68.000 euros para as catro contratacións, estanse a realizar tarefas de limpeza.

A representante autonómica lembrou que a convocatoria deste ano de Galicia Suma Talento: Rural Activo, dotada con 20 millóns de euros, deixou en total máis de 585.000 euros en 16 concellos da Delegación, o que significou a contratación de 34 persoas a xornada completa durante nove meses.

Aproveitou tamén para salientar as novidades coas que contou este ano o programa para reforzar a eficacia das actuacións preventivas. Entre elas destaca a creación da figura da persoa coordinadora municipal de prevención de incendios, destinada aos concellos adheridos ao convenio de colaboración entre a Xunta e Seaga en materia de prevención e defensa contra os incendios forestais. Estes municipios tiveron a posibilidade de contar cun contrato adicional para coordinar os equipos de traballo e planificar as actuacións de acordo coa estratexia autonómica.

Ademais, por primeira vez garantiuse aos concellos afectados polos grandes incendios forestais e aos adheridos a este convenio o mesmo número de contratacións que na convocatoria anterior. Tamén se incrementaron os apoios para os municipios con máis de 1.500 hectáreas de redes secundarias de franxas de xestión de biomasa.

O apoio da Xunta complétase cunha formación específica para as persoas coordinadoras en materias relacionadas coa prevención de incendios, o uso de maquinaria e ferramentas forestais e a seguridade no desempeño das súas funcións.