Salvaterra de Miño (Pontevedra), 12 de agosto de 2026

O director xeral de Gandaría, Agricultura e Industrias Agroalimentarias da Consellería do Medio Rural, José Balseiros, visitou hoxe a gandaría Garrido Rajo, localizada en Salvaterra de Miño e especializada na cría da cabra de raza Boer. Esta granxa leva anos traballando no ámbito da xenética, mediante a inseminación artificial a partir de material importado de Australia.

O director xeral salientou que Galicia é un referente na diversificación das producións gandeiras, favorecida polas boas condicións que ofrece a nosa comunidade para desenvolver diferentes e variados proxectos empresariais vinculados ao rural, e tamén na mellora xenética como ferramenta para impulsar a competitividade das explotacións.