Lugo, 14 de agosto de 2026.

O delegado territorial de Lugo, Alfonso Villares,   destacou hoxe o apoio da Xunta ao tecido empresarial a través do programa “Galicia Inviste”, impulsando a creación de novas empresas e a consolidación e crecemento das existentes.

Villares visitou dúas das sociedades beneficiarias destas axudas no municipio de Lugo e coñeceu os seus plans de crecemento da man dos seus responsables, Laura Aldariz, de Tecgal Enerxías, e Héctor Álvarez e José Antonio Carballal, de Vinilos Lugo. Subliñou que as pemes “son o principal motor de emprego e de creación de riqueza na provincia”, e gabou “o esforzo que realizan para innovar e ser competitivas”.

Neste sentido, lembrou que mediante esta iniciativa do Igape o Goberno galego destinou a 19 firmas lucenses achegas por un importe global superior aos 2 millóns de euros, que representa case o 30% do investimento apoiado.

En canto á distribución territorial, sete empresas teñen a súa sede no municipio da capital, dúas en Ribadeo e Sarria respectivamente, e as demais corresponden a Barreiros, Becerreá, Cervo, Guitiriz, Láncara, Pantón, Pol e Rábade. As achegas, cofinanciadas pola Unión Europea, respaldan os investimentos que realizan as pequenas e medianas empresas para a creación ou ampliación dos establecementos.

Tecgal Enerxías, dedicada ao sector das enerxías renovables, está construíndo unha nave de case 900 m² no polígono industrial das Gándaras, na rúa Roberto Novoa Santos. Contará con zona de oficinas, almacén e salas de traballo e exposición de equipos, entre outras.

Pola súa banda, Vinilos Lugo reformou as súas instalacións, que tamén están situadas no polígono das Gándaras, na rúa Ramón María Aller Ulloa. O proxecto afectou á zona que empregan para rotular vehículos, e incluíu a execución dunha nova estrutura e a incorporación dos equipamentos necesarios para o seu uso.