Gardacostas de Galicia decomisa máis de 260 quilos de marisco e peixe e preto de 660 aparellos ilegais nunha semana de controis no litoral
O servizo, dependente da Consellería do Mar, tramitou 46 actas de presunta infracción e incautación entre o 10 e o 16 de agosto en operativos desenvolvidos por terra e por mar nas rías galegas
Entre as artes requisadas destacan máis de 500 nasas de distintas tipoloxías, 129 cacharros e 25 pezas de redes de enmalle, devolvendo a maioría das especies vivas ao seu hábitat natural
Santiago de Compostela, 17 de agosto do 2026
O servizo de Gardacostas de Galicia, dependente da Consellería do Mar, comisou na última semana un total de 263,4 quilos de diversas especies de peixe e marisco e 656 aparellos de pesca e marisqueo ilegais ou antirregulamentarios. O balance dos operativos de vixilancia e loita contra o furtivismo realizados entre o 10 e o 16 de agosto saldouse coa tramitación de 46 actas de presunta infracción e incautación ao longo de toda a costa galega.
As actuacións foron executadas polas distintas unidades operativas do servizo (Portosín, Vilaxoán, Servizos Centrais, Vigo, A Coruña, Muxía, Ferrol e Celeiro), tanto mediante patrullas terrestres como a bordo de embarcacións coma o Irmáns García Nodal, o Valentín Paz Andrade ou a Mar de Galicia, así como en operativos conxuntos coa Policía Autonómica (ERPOL) e a Garda Civil (Seprona e Tráfico).
No eido das artes de pesca e marisqueo retiradas do mar por atoparse sen identificar, en zonas non autorizadas ou vulnerando a normativa vixente, os axentes incautaron 503 nasas (para polbo, nécora, camarón e centola), 129 cacharros para a captura de polbo, 25 pezas de artes de enmalle (12 trasmallos, 10 vetas e 3 miños), 15 nasas tipo voitirón, 1 viveiro e ferramentas manuais como sachos, rasqueta e truel.
Respecto ás especies incautadas, as maiores cantidades corresponderon a polbo (117,7 quilos, incluíndo partidas antirregulamentarias e produto conxelado sen trazabilidade), centola (40 quilos comisos na Ría de Vigo), pancho bicudo (30,2 quilos interceptados sen documentación en Vilaboa), nécora (31 quilos) e diversas variedades de bivalvos (máis de 35 quilos repartidos entre ameixa xaponesa, babosa, fina e navalla). Tamén se interviñeron cantidades menores de percebe, lura, choco, lumbrigante, raia, sargo e maragota.
A práctica totalidade do marisco e peixe comisado que se atopaba vivo durante os controis nas rías foi devolto ao mar para preservar os recursos mariños, mentres que as capturas aptas para o consumo que non podían ser reincorporadas ao medio foron doadas a centros benéficos e comedores sociais.
Imaxes relacionadas
