Ferrol, 2 de outubro de 2026

A secretaria xeral de Emprego e Relacións Laborais, Susana Pérez Iglesias, acompañada pola delegada da Xunta en Ferrol, Martina Aneiros, participou hoxe na gala de entrega dos XI Premios Ferrolterra Emprende, organizados por AJE Ferrolterra co apoio da Xunta. Alí, a secretaria xeral destacou os máis de 1.200 proxectos atendidos no Polo de emprendemento e apoio ao emprego de Ferrol e as case 180 empresas creadas grazas ao labor do persoal técnico do centro.

Na súa intervención na clausura do acto, a representante autonómica aproveitou para poñer en valor a colaboración de AJE precisamente coa Rede de polos no marco dun convenio coa Xunta para a realización de actividades de fomento do emprego e titorización empresarial. Así mesmo, salientou as achegas de entidades coma esta á hora de dar forma á futura Estratexia de emprendemento ligado ao territorio que terá como fío condutor esa Rede de polos composta por 15 oficinas distribuídas por toda Galicia.

No caso do Polo de Ferrol, Pérez Iglesias sinalou que predominan os servizos entre os sectores asesorados (24 %), seguidos do comercio (23 %) e da hostalaría (12 %). Coas persoas atendidas —un 60 % delas, mulleres— lévanse realizado máis de 2.700 titorías, entre as presenciais e online. En canto ás actividades, o Polo de Ferrol acumula unhas 170 entre reunións con entidades do territorio, formacións e eventos.