Santiago de Compostela, 15 de outubro de 2026

O director da Axencia Galega da Calidade Alimentaria (AGACAL), Martín Alemparte, participou hoxe na apertura da xornada Transformar para xerar valor, celebrada na Casa RIA, onde destacou o papel da Artesanía Alimentaria de Galicia como ferramenta para diferenciar as pequenas producións agroalimentarias, incrementar o seu valor engadido e xerar novas oportunidades económicas no rural.

Durante a súa intervención, Alemparte salientou que “a Artesanía Alimentaria non pode ser simplemente un selo ou un reclamo comercial, senón un compromiso coa excelencia, coa calidade, coa singularidade e co bo facer dos nosos artesáns”. Neste sentido, incidiu na importancia de acompañar os produtores para mellorar a súa diferenciación, reforzar o recoñecemento dos seus produtos e facilitar o acceso aos mercados.

Así mesmo, defendeu que o reto non é conseguir que as pequenas producións deixen de ser pequenas, senón aumentar o seu valor para facelas viables e garantir o seu futuro, contribuíndo á xeración de renda e ao mantemento da actividade económica no territorio.

A xornada, enmarcada no ciclo O pequeno é grande, contou cunha mesa de conversa con representantes de Sacrapastas, Xearte, Ánades Galicia, Cien Porcel, A Morena e Sidra Rabiosa, na que se abordaron os retos da transformación, a comercialización e a creación de valor sen perder a singularidade das elaboracións artesanais.