Lugo, 16 de outubro de 2026

A Consellería de Emprego, Comercio e Emigración publicou no DOG a resolución da orde de axudas deste ano para potenciar as prazas de abastos e mercados municipais.

Os concellos de Lugo, Viveiro e Ribadeo suman 577.300 euros a través desta convocatoria, destinada a financiar proxectos de mellora e dinamización destes espazos comerciais.

O delegado territorial da Xunta, Alfonso Villares, visitou hoxe a praza de abastos da capital lucense, onde percorreu diferentes postos de venda para coñecer como é o día a día dos comerciantes e praceiros que desenvolven alí a súa actividade.

Este recinto verá mellorado o acceso pola rúa Tuñas Bouzón logo da actuación que está a desenvolver o Concello cunha achega autonómica de 97.600 euros.

No caso de Viveiro, a resolución publicada no DOG contempla a concesión de 320.000 euros en dúas anualidades para acometer obras de reforma do mercado municipal; e en Ribadeo a contía é de 159.700 euros.

Villares subliñou o papel que xogan as prazas e mercados de abastos para dinamizar comercialmente os centros das cidades e vilas, ademais de ser referentes na venda de alimentos de proximidade e produtos de calidade diferenciada.