Santiago de Compostela, 12 de novembro de 2026

A Xunta de Galicia apoia con máis de 1,5 M€ a cinco empresas tecnolóxicas que desenvolven solucións innovadoras con alto potencial de mercado. A Consellería de Educación, Ciencia, Universidades e FP, a través da Axencia Galega de Innovación, acaba de resolver a convocatoria de Recuperación de Excelencia Neotec mediante a que o Goberno galego rescata proxectos de empresas galegas que se presentaron á convocatoria estatal pero que quedaron fóra por insuficiencia de crédito. O obxectivo da Xunta é financiar estas iniciativas, que destacan pola súa calidade, para facelas viables e evitar que decaian por falta de apoio.

As cinco empresas beneficiarias desta convocatoria, cun perfil innovador e tecnolóxico, contan co Selo Neotec e destacan pola súa especialización en ámbitos de coñecemento avanzado e pola súa orientación ao desenvolvemento de solucións innovadoras con alto potencial de mercado. Son compañías de recente creación, constituídas entre os anos 2022 e 2024, con sede social ou centro de traballo en Galicia e con capacidade para transformar coñecemento científico e tecnolóxico en novos produtos e servizos.

Cada unha das pemes seleccionadas nesta convocatoria recibirán ata un máximo de 325.000 euros ata 2028. Todas elas superaron os limiares mínimos de avaliación do programa Neotec do Centro para o Desenvolvemento Tecnolóxico e a Innovación (CDTI), na súa convocatoria de 2025.

No seu conxunto, estas iniciativas reflicten a diversidade e o potencial do emprendemento tecnolóxico galego, con proxectos que combinan a intelixencia artificial, novos materiais, biotecnoloxía e simulación avanzada para dar resposta a retos tecnolóxicos vinculados aos sectores estratéxicos STEP (Plataforma de Tecnoloxías Estratéxicas para Europa) e contribúen á xeración de actividade económica de alto valor engadido.

Unha das novidades desta convocatoria é, precisamente, a financiación de proxectos STEP, relacionados con tecnoloxías críticas: desde biotecnoloxía, a intelixencia artificial ou tecnoloxías cuánticas, eidos que promove Europa e que son tamén ámbitos de especialización prioritarios para Galicia, tal e como establece o Plan Galego de Investigación e Innovación 2025-2027.

As compañías apoiadas nesta convocatoria son:

• Slimop Space: Con sede en Nigrán, desenvolve telescopios espaciais innovadores mediante o uso de estruturas optomecánicas ultralixeiras e novos materiais.
• Sedna International Institute: Situada en Gondomar, aplica a intelixencia artificial ao ámbito financeiro para impulsar modelos de investimento ético e sostible.
• Sortcell Analytica: Adícase ao desenvolvemento de tecnoloxías de biopsia líquida para o illamento de células tumorais circulantes, con aplicación na medicina personalizada. Ten sede en Vigo.
• Nsilica Simulation Technologies: Localizada en Nigrán, desenvolve ferramentas de simulación biomecánica e intelixencia artificial para mellorar o deseño e a avaliación de próteses e implantes.
• Corpus Computacional Biomechanics: Aplica a intelixencia artificial e a simulación avanzada para xerar xemelgos dixitais anatómicos da columna vertebral que faciliten a planificación cirúrxica e a toma de decisións clínicas. Ten sede en Viveiro.