Lugo, 12 de novembro de 2026

A xerente do Instituto de Seguridade e Saúde Laboral de Galicia (Issga), Adela Quinzá-Torroja, clausurou hoxe en Lugo o ciclo de seminarios técnicos Avaliación e integración preventiva no ámbito da psicosocioloxía aplicada, unha iniciativa de formación especializada desenvolvida desde outubro nos catro centros territoriais do Instituto e dirixida a reforzar as competencias do persoal técnico de prevención.

A formación, incluída no plan de actuación do Issga para 2026, abordou os criterios e as ferramentas necesarios para avaliar os factores de risco psicosocial de orixe laboral e integrar os resultados na planificación preventiva. A través da análise de casos prácticos e do intercambio de experiencias, traballouse na identificación destes factores e na elaboración de medidas preventivas que permitan actuar sobre a organización e as condicións de traballo.

A iniciativa dirixiuse principalmente a persoal técnico dos servizos de prevención propios e alleos, incluídos os das administracións públicas e os servizos de saúde, así como a profesionais dos gabinetes de prevención das organizacións sindicais e empresariais.

Continuidade no marco do plan integral de benestar laboral

Esta liña de traballo terá continuidade en 2027 no marco do Plan integral para a mellora da prevención, o benestar laboral e a reincorporación saudable ao traballo en Galicia 2026-2029, que establece unha folla de ruta para avanzar na mellora das condicións de traballo, reforzar a prevención dos riscos laborais e promover a saúde e o benestar das persoas traballadoras.

Neste contexto, o Issga —como organismo técnico de referencia— prevé dar continuidade a este tipo de seminarios e ampliar a proposta formativa en ergonomía e psicosocioloxía aplicada, co obxectivo de consolidar un modelo de capacitación práctica que proporcione aos profesionais ferramentas para identificar, avaliar e previr os riscos laborais.

Así mesmo, o Instituto avanzará no reforzo dos seus medios humanos e técnicos e no desenvolvemento de actuacións específicas para mellorar as condicións de traballo, con especial atención aos trastornos musculoesqueléticos e aos riscos psicosociais.