Santiago de Compostela, 15 de novembro de 2026

O conselleiro de Educación, Ciencia, Universidades e FP, Román Rodríguez, compartiu cos representantes da Asociación de Directores e directivos de IES de Galicia, ADDIGA, o novo paquete de medidas da Xunta para reforzar a convivencia nas aulas e protexer a autoridade do profesorado que inclúe sancións ante agresións.

O titular de Educación do Goberno galego expuxo que, aínda que en Galicia existe unha boa convivencia nas aulas, é necesario seguir reforzando este clima de “respecto, responsabilidade e convivencia como unha condición necesaria para garantir o proceso de aprendizaxe e blindar a calidade do noso ensino”.

Para o caso concreto de agresións aos docentes por parte das familias, a través da lei de acompañamento aos Orzamentos 2027, refórmase a normativa de convivencia, á que se incorpora un novo réxime administrativo pioneiro en España de infraccións e sancións económicas que irán desde os 300 euros das infraccións leves ata os 15.000 euros das moi graves.

Deste xeito, a Xunta incorpora unha vía administrativa propia de protección, prevención inmediata e reparación do dano causado, polo que a protección do profesorado “deixa de depender unicamente da resposta interna do centro ou, en casos extremos, da vía penal”, explicou o conselleiro. Estas consecuencias administrativas proporcionais á gravidade dos feitos serán compatibles coas posibles responsabilidades civís ou penais correspondentes.

Ademais, paralelamente, poderanse adoptar medidas provisionais de protección mentres se tramita o procedemento, como pode ser a limitación temporal do acceso ao centro educativo ou da participación nas actividades escolares ou das canles de comunicación co profesorado afectado.

Así mesmo, o conselleiro informoulles da “inminente” entrada en funcionamento da Oficina de apoio ao profesorado, un novo servizo para reforzar a protección do docente e o recoñecemento legal como autoridade pública. A través desta oficina, a Consellería de Educación proporcionará acompañamento e orientación aos docentes no exercicio das súas funcións, incluído asesoramento e asistencia xurídica, de ser necesario.

Educar no valor das normas

Por outra parte, Román Rodríguez fixo fincapé tamén na importancia de educar ao alumnado “no valor das normas” e a necesidade de establecer medidas específicas “cunha finalidade educativa e reparadora”. Nesta liña lembrou que, mediante a modificación da normativa de convivencia tamén se actualizou o marco para responder ás novas formas de conflitividade, mellorar a gradación e eficacia das medidas e incrementar a protección do alumnado e do profesorado.

En canto ás medidas correctoras previstas, para o caso de condutas de maior gravidade establécese a suspensión da asistencia ao centro por períodos máis amplos ou o cambio definitivo de grupo, por exemplo. No caso concreto de situacións de acoso e ciberacoso establécese, con carácter xeral, o cambio de centro nas ensinanzas obrigatorias ou a perda do dereito a continuar escolarizado no centro nas restantes ensinanzas, para quen cometa esta conduta. Nestes supostos, a medida poderá estender os seus efectos á imposibilidade dunha nova matrícula no centro.