A conselleira de Política Social e Xuventude, Fabiola García, acompañada da conselleira de Promoción do Emprego e Igualdade, Elena Rivo, visitou as instalacións da entidade en Ourense
Política Social fomenta a inserción laboral das persoas con síndrome de Down
O Goberno galego asinou un convenio de colaboración con Down Galicia para promover prácticas formativas dirixidas a 22 persoas con síndrome de Down
Destínanse 140.000 euros a este programa que se realiza en distintas dependencias da Administración como xefaturas territoriais e centros de servizos sociais
Ourense, 23 de setembro de 2023 A Consellería de Política Social e Xuventude asinou un convenio de colaboración con Down Galicia para promover a inserción laboral das persoas con discapacidade en distintos puntos da nosa Comunidade. A conselleira de Política Social e Xuventude, Fabiola García, acompañada da conselleira de Promoción do Emprego e Igualdade, Elena Rivo, visitou esta semana as instalacións de Down Ourense, que tamén se beneficia deste convenio.
A conselleira lembrou que o Goberno galego traballa para que as persoas con discapacidade teñan unha vida activa, plena e completamente integrada na sociedade. Neste sentido, o convenio de colaboración asinado con Down Galicia permite que 22 persoas con discapacidade realicen actividades formativas en distintas dependencias da Administración como xefaturas territoriais e centros de servizos sociais.
A Xunta destina 145.000 euros a esta finalidade que se complementa con outras axudas para promover a autonomía das persoas con síndrome de Down. Durante a visita ás instalacións de Ourense, as conselleiras puideron coñecer as sesións de formación e orientación que se realizan neste centro para que conten coas ferramentas necesarias para o seu día a día. Así, entre as actividades que se ofrecen atópase apoio para facer xestións, ir ao supermercado ou empregar o transporte público.
Imaxes relacionadas
