Trenor anuncia unha nova obra de 392.000€ no CEIP O Mosteirón de Sada que eleva o investimento comprometido pola xunta na comarca da Coruña a 3,9 M€

O delegado da Xunta na Coruña, Gonzalo Trenor, anunciou hoxe a licitación dunha nova actuación no Ceip do Mosteirón de Sada que contará cunha partida de 392.000 euros, o que eleva o investimento comprometido pola Xunta de Galicia na comarca da Coruña máis de 3,9 M€ entre grandes obras, obras menores e a instalación de placas fotovoltaicas.

Trenor subliñou que esta actuación busca “mellorar as condicións xerais do centro, en especial o confort do alumnado e do profesorado e a eficiencia enerxética”. A intervención contempla a substitución da cuberta de 1.815 metros cadrados por outra nova de tella e outras obras menores propostas polo equipo directivo.

O representante da da Xunta de Galicia explicou que esta actuación se enmarca no Plan de Nova Arquitectura Pedagóxica de Galicia, a folla de ruta do Goberno galego para renovar as instalacións educativas e adaptalas ás necesidades do século XXI.

“Este plan ten entre as súas prioridades mellorar a eficiencia enerxética dos edificios educativos, o que redunda ademais nun maior confort térmico para todos os membros da comunidade escolar”, sinalou o delegado. “Actuacións como esta, de renovación de cuberta que acometeremos neste instituto, son fundamentais para avanzar neste obxectivo de acadar centros educativos máis verdes e máis respectuosos co medio ambiente”, destacou.

Obras centros educativos Coruña

Esta nova intervención súmanse ás que o Goberno galego está executando nos concellos da Área Metropolitana da Coruña sen contar as da cidade.  Concretamente, a Xunta de Galicia está a investir máis de 3,9 millóns de euros en 32 actuacións que inclúen 10 grandes obras en Aranga, Abegondo, Culleredo, Curtis, Oleiros, Oza-Cesuras, Sada e Vilasantar, a instalación de placas fotovoltaicas en centros educativos de Betanzos, Carral, Culleredo e Oleiros e 14 obras menores en 12 colexios e institutos da comarca da Coruña.

GRANDES OBRAS

OBRAS MENORES

PLACA FOTOVOLTAICAS