Axenda Cultura

Aplicación oficial da Xunta de Galicia para a consulta dos eventos culturais que teñen lugar en Galicia.

Descarga
Android
iOS

Axenda Cultura é a aplicación que leva aos dispositivos móbiles da cidadanía todos os eventos que se publican na axenda do portal Cultura.gal. Trátase dunha axenda elaborada de maneira conxunta por diferentes departamentos, co obxectivo de reunir nun mesmo espazo toda a programación de eventos culturais, tanto os que organiza a Administración autonómica como aqueles outros que son de grande interese para a cidadanía.

En Axenda Cultura as persoas usuarias poden atopar, entre outras, as actividades promovidas pola D. X. de Políticas Culturais, a S. X. de Política Lingüística, Agadic, os Museos de Galicia, os Arquivos de Galicia, a Cidade da Cultura, a Rede de Bibliotecas de Galicia e as bibliotecas públicas das cidades. Tamén se atopan as festas de interese turístico.

A tipoloxía de eventos que se atopan na axenda é variada: concertos, espectáculos escénicos, proxeccións audiovisuais, exposicións, obradoiros, xornadas e congresos, festas, feiras, festivais, roteiros e outras actividades.

A través dun servizo web dispoñible en Abert@s, os eventos da axenda móstranse en diferentes portais web, como Turismo de Galicia e Lingua.gal. Tamén é posible que calquera persoa o integre na súa web mediante un widget configurable.   

A versión actual da aplicación móbil, dispoñible para Android e iOs, permite personalizar a axenda, con eventos suxeridos en función dos intereses de cada persoa usuaria. A aplicación permite:

  • Consultar os próximos eventos culturais.
  • Configurar unha busca predeterminada en función dos intereses.
  • Buscar os eventos por data, lugar, tipoloxía e por proximidade á persoa usuaria.
  • Marcar eventos como favoritos, gardalos no calendario, compartilos.
Departamento: C. de Cultura e Turismo