A conselleira de Vivenda e Planificación de Infraestruturas, María M. Allegue, xunto ao delegado territorial da Xunta, Manuel Pardo, e a directora xeral de Urbanismo, Encarnación Rivas, achegouse hoxe ata este núcleo ourensán para coñecer o resultado destas actuacións
A Xunta remata as obras de humanización no núcleo de Santa Ana, en Sandiás, que supuxeron un investimento total de máis de 320.000 €
Estas actuacións desenvolvéronse ao abeiro do Plan Hurbe e a partir dun convenio entre a Xunta, que achegou o 70 % do investimento, e o Concello, o 30 % restante
A intervención incluíu a renovación e soterrado dos servizos e a reposición dos pavimentos para dispoñer unhas rúas renovadas, máis amables e accesibles
Allegue destacou que os Orzamentos da Xunta para 2026 consignan para a provincia de Ourense 69,34 M€, dos que 26,44 M€ se destinarán a vivenda
As contas autonómicas dedican 38,5 M€ ao ámbito das infraestruturas na provincia, destacando partidas como a do Plan de vialidade invernal, con case 7 M€
Sandiás (Ourense), 31 de outubro de 2025
A Xunta vén de rematar as obras de humanización no núcleo de Santa Ana, en Sandiás, que supuxeron un investimento total de máis de 320.000 € e que se enmarcan no Plan Hurbe da Administración autonómica.
A conselleira de Vivenda e Planificación de Infraestruturas, María M. Allegue, xunto ao delegado territorial da Xunta, Manuel Pardo, e a directora xeral de Urbanismo, Encarnación Rivas, achegouse hoxe ata este núcleo ourensán para coñecer o resultado destas actuacións que se impulsaron ao abeiro do convenio entre a Xunta, que aportou o 70 % do investimento, e o Concello de Sandiás, que achegou o 30 % restante.
A intervención incluíu a renovación e soterrado dos servizos (electricidade, telecomunicacións e iluminación) e a reposición dos pavimentos que permiten contar cunhas rúas renovadas e accesibles.
Allegue destacou a importancia de apostar por estas intervencións que son as que melloran as contornas urbanas das vilas e contribúen a reforzar a calidade de vida dos veciños.
Puxo en valor o Plan Hurbe, que como neste caso posibilita a colaboración coas entidades locais para a execución de obras de mellora de contornos urbanos, de accesibilidade e de equipamentos públicos que teñan por finalidade a revitalización do territorio e o reequilibrio territorial.
Tamén salientou o obxectivo de asentar poboación no rural, para o que é fundamental que as persoas conten con servizos e equipamentos necesarios.
Subliñou que os Orzamentos da Xunta do 2026 teñen consignados para a provincia de Ourense partidas que suman 3,5 M€ en materia de urbanismo.
Ademais recordou que as contas autonómicas centran esforzos en seguir a impulsar o acceso á vivenda e en continuar vertebrando a provincia a través das infraestruturas autonómicas.
O orzamento global da Consellería para a provincia de Ourense, de 69,34 M€, dos que 26,44 M€ se destinarán a vivenda.
Ademais, en infraestruturas, a provincia contará cunha dotación de 38,5 M€ para os novos quilómetros de estradas e tamén para manter a conservación e seguridade viaria. O Plan de vialidade invernal contempla case 7 M€ para a provincia e os reforzos de firme, 5 M€.
Imaxes relacionadas
