Ponteareas (Pontevedra), 1 de setembro de 2026

O delegado territorial da Xunta en Pontevedra, Pablo Fernández, visitou esta mañá a nova oficina de emprego de Ponteareas, unhas instalacións que foron reformadas o pasado ano grazas a un investimento de máis de 400.000 euros.

Durante a visita, o delegado puxo en valor a aposta da Xunta por ofrecer á cidadanía unhas instalacións máis modernas, accesibles e adaptadas ás necesidades das persoas que buscan emprego, así como por reforzar as políticas activas de emprego e formación.

Neste sentido, destacou que ao longo do último curso a Xunta destinou máis de 1,2 millóns de euros a Ponteareas a través das principais iniciativas de promoción do emprego e da formación, co obxectivo de mellorar as oportunidades de acceso ao mercado laboral, especialmente entre as persoas desempregadas e a mocidade.

En concreto, este investimento canalizouse a través de tres dos principais programas que desenvolve o Goberno galego neste ámbito: os Obradoiros Duais de Emprego, os Obradoiros de Talento Mozo e as Accións Formativas para persoas desempregadas (AFD).

O delegado sinalou que estas iniciativas permiten ofrecer ás persoas participantes formación especializada, experiencia práctica e novas ferramentas para mellorar a súa empregabilidade, ao tempo que responden ás necesidades reais do tecido produtivo e das empresas.

“Desde a Xunta seguimos apostando por políticas de emprego que combinen formación e experiencia e que permitan ás persoas ter máis oportunidades para acceder a un posto de traballo”, sinalou o delegado, quen engadiu que a renovación da oficina de emprego de Ponteareas “é tamén unha mostra do compromiso por prestar un servizo público máis próximo, moderno e de calidade”.