A Consellería do Mar enxalza o labor do XXXII Gran Capítulo Internacional Confraría do Centolo Larpeiro a prol da promoción do marisco galego
O obxectivo destas xornadas é poñer en valor un dos produtos estrela da gastronomía galega no que participan máis de 500 persoas
O Grove (Pontevedra), 23 de novembro do 2024
A Consellería do Mar enxalza o labor de promoción do marisco galego na celebración do XXXII Gran Capítulo Internacional Confraría do Centolo Larpeiro no municipio pontevedrés de O Grove. Así o manifestou a directora xeral de Desenvolvemento Pesqueiro, Marta Villaverde, quen resaltou a gran variedade e calidade dos produtos do mar que ofrece o litoral galego entre os que o centolo é un dos máis representativos. Nesta liña, tamén destacou a importancia deste tipo de eventos no que se concentran representantes de distintas confrarías gastronómicas de diferentes puntos de España e Portugal contribuíndo a divulgar máis alá da comunidade o sabor dun dos elementos máis destacados da gastronomía da comunidade.
O obxectivo principal destas xornadas é poñer en valor un dos produtos estrela do mar de Galicia, sen embargo, a directora xeral convidou aos participantes a aproveitar a súa estancia para degustar o resto dos produtos que ofrece a costa galega e que son motivo suficiente para volver a visitar en calquera momento do ano. Marta Villaverde trasladou os parabéns aos recen nomeados como novos confrades así como á confraría do Centolo Larpeiro polo seu traballo na divulgación e difusión das calidades gastronómicas do centolo. No que levamos de ano foron capturadas máis de 236 toneladas desta especie por un valor que supera os 2,7 millóns de euros.
Imaxes relacionadas
