Cuntis (Pontevedra), 5 de decembro de 2024

A directora xeral de Traballo Autónomo e Economía Social, Marta Mariño, participou hoxe na clausura da xornada Economía dos coidados: emprendemento para transformar o modelo actual, organizada no marco das actividades do Polo de emprendemento e apoio ao emprego de Silleda. Alí puxo de relevo o valor da Rede de polos para ofrecer recursos e asesoramento en materia de emprendemento de negocios. De feito, nas 15 oficinas coas que conta no territorio galego, lévanse asesorado máis de 2.900 proxectos.

Un exemplo deste labor é a organización de xornadas como esta, realizada co fin de intercambiar aprendizaxes e achegar recursos entre profesionais do sector dos coidados. Deste xeito, búscase revalorizar esta área como unha saída profesional vocacional e digna, capacitar ás persoas emprendedoras interesadas en emprender neste sector e compartir boas prácticas e iniciativas innovadoras.