Santiago de Compostela, 13 de maio de 2025

O conselleiro de Sanidade, Antonio Gómez Caamaño, resaltou a alianza histórica de médicos e farmacéuticos en defensa de toda a sociedade durante a súa intervención na clausura do acto conmemorativo dos 130 anos de fundación destes colexios oficiais da provincia da Coruña.

No acto, que tivo lugar no Pazo de Fonseca, o conselleiro de Sanidade resaltou a colaboración co Colexio de Farmacéuticos da Coruña na rede de farmacias sentinela da Xunta que contribuíu á vixilancia da gripe e na que participan 30 oficinas da provincia.

Tamén referiu o servizo aos pacientes que prestan as farmacias cos programas de sistemas personalizados de dosificación e coa dispensación de medicamentos non demorables, en contacto cun médico do Servizo Galego de Saúde nun teléfono habilitado ao efecto.

Gómez Caamaño alentou esta vontade de colaboración entre o colectivo médico e farmacéutico na procura de respostas aos retos da sanidade actual.

Neste sentido, louvou a conferencia do doutor César de la Fuente Núñez, quen falou sobre como a intelixencia artificial pode transformar o descubrimento de antibióticos e abrir novos horizontes na loita contra as resistencias bacterianas.

O conselleiro rematou a súa intervención lembrando que a atención sanitaria se debe afrontar desde unha perspectiva compartida xa que, dixo, só desde a colaboración entre profesionais, administración e sociedade, poderemos dar respostas máis humanas, máis eficaces e máis xustas aos novos retos.

Amosouse confiado en que a celebración deste 130 aniversario servirá para reforzar esa alianza histórica entre médicos e farmacéuticos e para seguir avanzando, con unidade, cara ao futuro.