Lugo, 23 de setembro de 2025

A conselleira do Medio Rural, María José Gómez, participou esta mañá na inauguración da 63ª Reunión Científica da Sociedade Española de Pastos, que está a ter lugar hoxe na Escola Politécnica Superior de Enxeñería de Lugo. Alí, María José Gómez salientou as vantaxes que presentan os pasteiros para o medio rural galego e salientou tamén a “aposta decidida” da Xunta neste eido, cun investimento de 10,5 millóns de euros desde o ano 2020 e máis de 1.930 hectáreas mobilizadas no marco do Plan de Pastos de Galicia.

A conselleira sinalou que a través deste orzamento puideron levarse a cabo 80 pasteiros nos últimos cinco anos; unha cifra á que hai que engadirlle outras 519 hectáreas distribuídas en 26 novos pasteiros que estarán rematados cara finais de ano, cun orzamento adicional de 4 millóns de euros.

María José Gómez definiu estes sistemas como un “elemento vertebrador” do medio rural que contribúe a manter o emprego, favorece a remuda xeracional e axuda a conservar prácticas tradicionais como a transhumancia ou o aproveitamento silvopastoril. Ademais, puxo de relevo o seu labor dende o punto de vista ambiental, ao actuar como ecosistemas de alta biodiversidade que desempeñan funcións esenciais como sumidoiros de carbono, protección do solo fronte a erosión ou reguladores do ciclo da auga e de prevención fronte aos incendios forestais.

Neste sentido, puxo en valor o foro organizado pola Sociedade Española de Pastos, xa que a investigación é un “aliado fundamental” dos pasteiros, ao representar unha maneira de producir alimentos con menor dependencia de combustibles fósiles e con maior respecto polos ecosistemas. Referiuse a este congreso académico como “un foro de transferencia de coñecemento” entre universidades, centros de investigación, administracións, gandeiros e xestores do territorio; no que compartir innovación e boas prácticas.

Pasteiro de Frexulfe

Posteriormente, María José Gómez trasladouse ata o concello do Valadouro, onde coñeceu os traballos realizados ao abeiro do Plan de Pastos no monte de Frexulfe. A actuación abrangue un total de 14,05 hectáreas na que se investiu algo máis de 176.400 euros. Con este orzamento puideron levarse a cabo todos os labores necesarios para a posta en marcha deste pasteiro, como poden ser a súa implantación, a construción da manga de manexo, a execución do peche perimetral e o subministro de bebedoiros, entre outros.

Deste xeito, a conselleira incidiu en que estes pasteiros son un modelo de aproveitamento do territorio sustentable e compatible coa preservación do patrimonio natural. Así mesmo, xogan un papel fundamental á hora de favorecer a gandaría en extensivo. De feito, a Mancomunidade de Montes en Man Común integra 14 propietarios, que na actualidade reúnen unhas 300 cabezas de gando vacún en extensivo.