A Xunta licita por preto de 520.000 euros a adquisición de equipamento electromédico para centros de saúde
As empresas interesadas neste contrato teñen de prazo ata o 3 de novembro para presentar as súas ofertas
Ao estar próxima a finalización das obras do CIS Olimpia Valencia de Vigo, do centro de saúde de Moaña e do de Abegondo, a contratación responde á necesidade de dotar a estes centros con equipamento electromédico
Ademais, dótase con equipamento de tratamento dental os centros de saúde Abente e Lago (A Coruña), Conxo (Santiago de Compostela), Val Miñor, Ponteareas, O Porriño e Redondela
Santiago de Compostela, 17 de outubro de 2025
A Xunta vén de publicar no Portal de Contratos Públicos a licitación, por importe de 519.513 euros, do subministro de equipamento electromédico con destino a diversos centros de saúde do Servizo Galego de Saúde.
As empresas interesadas neste contrato teñen de prazo ata o 3 de novembro para presentar as súas ofertas.
Ao estar próxima a finalización das obras do Centro Integral de Saúde Olimpia Valencia de Vigo, do centro de saúde de Moaña e do centro de saúde de Abegondo, esta contratación responde á necesidade de dotar estes centros do primeiro nivel asistencial da rede sanitaria pública galega co equipamento electromédico necesario para a súa posta en funcionamento.
Ao mesmo tempo, xorde a necesidade de dotar con equipamento de tratamento dental os centros de saúde Abente e Lago (A Coruña), de Conxo (Santiago de Compostela), do Val Miñor, de Ponteareas, do Porriño e de Redondela.
Todo este equipamento inclúe autoclaves para esterilización, electrocardiógrafos 12 canais, sistemas de adquisición e monitorización automatizada de constantes vitais, equipos de radiografía intraoral, equipamento de tratamento dental (sillóns de dentista e instrumental e aparellos de odontoloxía) e ecógrafos portátiles.
