Ourense, 2 de xuño de 2026

O conselleiro de Emprego, Comercio e Emigración, José González, acompañado polo director xeral de Comercio e Consumo, Gabriel Alén, participou hoxe no acto de clausura da Asemblea Xeral da Confederación Empresarial de Ourense (CEO), onde puxo en valor o bo momento que atravesa o mercado laboral tras rexistrar o mellor maio da serie histórica tanto en afiliacións, con 1.111.867 cotizantes á Seguridade Social, como en paro, con 109.355 persoas desempregadas. Esta tendencia tamén se reflicte en Ourense, que conta con 13.453 persoas no paro, o mellor maio desde que hai rexistros, e 109.185 afiliacións, o maior número nun mes de maio desde 2008.

Para a consecución destes resultados, subliñou a contribución do bo comportamento do tecido empresarial galego apoiado no dinamismo das empresas e de asociacións como a CEO que fan posible a creación de emprego real e de calidade na Comunidade e trasladou o compromiso da Xunta de acompañar o tecido produtivo nos principais retos que afronta, entre os que salientou a adaptación da formación para o emprego ás necesidades das empresas, a cobertura de vacantes, a atracción de talento, ou a mellora do benestar laboral e a redución do impacto do absentismo.

No eido da formación para o emprego, e no marco da ampla batería de medidas autonómicas neste campo, informou de que precisamente hoxe abriu o prazo de solicitude dos Bonos Talento Empresa, unha iniciativa dotada con 2,2 M€ destinada á posta en marcha de accións formativas non regradas e de curta duración —entre 16 e 100 horas—, adaptadas ás necesidades específicas de cada empresa e orientadas a mellorar os coñecementos e competencias dos seus cadros de persoal.

Atracción de talento ao rural

José González puxo en valor a nova orde conxunta das consellerías de Emprego e de Vivenda para favorecer a atracción de traballadores mediante a rehabilitación de vivendas en concellos de menos de 20.000 habitantes. As axudas, que poden solicitar empresas, persoas físicas ou xurídicas e concellos ata o vindeiro 15 de xullo, parten da consideración da vivenda como un factor clave para atraer e fixar talento cualificado, reforzando a dispoñibilidade de man de obra en sectores estratéxicos como o lácteo ou o agroandeiro.

Ademais, no marco do plan de atracción de talento da Xunta, con especial foco no retorno da diáspora, o conselleiro explicou que participará esta semana nunha nova edición das feiras de emprego no exterior que se celebrarán en São Paulo e Salvador de Bahía os días 6 e 8 de xuño. Estas citas servirán para dar a coñecer oportunidades de retorno a Galicia a través de iniciativas como o programa Retorna Cualifica Emprego, integrado na Estratexia Galicia Retorna e dotado con 2,3 M€ na súa edición 2026-2027.

Pulo ao comercio local

No ámbito comercial, González destacou a boa acollida da recente edición dos Bonos Activa Comercio, que mobilizaron preto de 170.000 euros na provincia de Ourense e contaron coa adhesión duns 900 establecementos, reforzando o comercio de proximidade.

Así mesmo, puxo en valor a aposta da Xunta pola modernización das prazas de abastos e a ampliación da Rede de Mercados Excelentes, que vén de motivar unha nova folla de ruta autonómica en colaboración coas entidades locais que prevé apoios de ata o 70 % para actuacións de mellora e modernización destes espazos co obxectivo de acadar 25 mercados distinguidos en Galicia en 2030. Nesta liña, lembrou o protocolo de colaboración asinado entre a Consellería e a Deputación de Ourense para impulsar a renovación das prazas de abastos da provincia, con iniciativas xa en marcha en concellos como O Carballiño e Xinzo de Limia, e remarcou de novo a man tendida ao concello de Ourense para desbloquear a situación da praza de abastos nº1.