Santiago de Compostela, 30 de xuño de 2026

A secretaria xeral técnica da Consellería do Medio Rural, Marta Forés, acompañada polo director-xerente da Fundación Centro Tecnolóxico da Carne (CTC), Miguel Fernández, presidiu hoxe a reunión do padroado desta entidade. Nela, salientouse a cooperación do CTC no desenvolvemento de ata 30 proxectos de I+D+i ao longo de 2025, en colaboración con empresas e axentes do sector e por un valor global de 14,3 millóns de euros.

Na xuntanza, na que tamén participaron de forma telemática o director xeral de Gandaría, Agricultura e Industrias Agroalimentarias, José Balseiros; e o director da Axencia Galega da Calidade Alimentaria, Martín Alemparte; aprobáronse as contas do pasado ano do CTC, que acadaron a cifra de máis de 1,7 millóns de euros. Este orzamento executado está relacionado cunha importante carteira de proxectos de I+D+i, que se traduce nunha relevante actividade ao servizo do sector agroalimentario galego.

Ademais da participación en traballos de investigación, o CTC tamén levou a cabo preto de 35.000 determinacións analíticas nos seus laboratorios en 7.354 mostras, sendo esta unha importante parte do seu labor. Ademais, ofreceu asesoramento ao sector, organizou xornadas de difusión e simulou procesos e produtos na súa planta piloto.

Actividades no primeiro semestre de 2026

Tamén se avaliou a actividade neste primeiro semestre do ano, no que destaca o desenvolvemento de 32 proxectos de I+D+i, cun investimento global de máis de 24 millóns de euros.