Santiago de Compostela, 25 de agosto de 2026

O Portal de Contratos Públicos de Galicia publicou, por medio a Consellería de Sanidade, a licitación do subministro, instalación e posta en funcionamento dun sistema avanzado de láser CO₂ para microcirurxía do servizo de ortorrinolaringoloxía (ORL) do Hospital Clínico Universitario de Santiago de Compostela, por un importe de 145.805 euros.

As empresas interesadas nesta contratación teñen de prazo ata o nove de setembro para presentar as súas ofertas.

A dispoñibilidade deste equipamento contribuirá a mellorar as capacidades cirúrxicas do servizo de otorrinolaringoloxía mediante técnicas de elevada precisión sobre tecidos brandos.

Así mesmo, o novo equipamento permitirá favorecer a realización de procedementos minimamente invasivos con menor afectación de tecidos adxacentes e incrementar a seguridade e precisión durante procedementos de microcirurxía larínxea e cirurxía ORL avanzada.

Engadido ao anterior, este sistema permitirá ampliar as posibilidades terapéuticas e cirúrxicas do centro mediante tecnoloxías de transmisión flexible e sistemas avanzados de escaneado, así como mellorar a autonomía tecnolóxica e a capacidade resolutiva da área sanitaria.

Esta contratación enmárcase dentro da estratexia do Servizo Galego de Saúde de renovación progresiva e actualización tecnolóxica dos recursos electromédicos e equipamentos cirúrxicos, respondendo a criterios de necesidade asistencial, mellora operativa, seguridade clínica e utilización eficiente dos recursos públicos.