Moraña (Pontevedra), 16 de setembro de 2026

O conselleiro de Emprego, Comercio e Emigración, José González, clausurou hoxe o acto de entrega dos Premios de Responsabilidade Social Empresarial (RSE) de Galicia 2026, onde puxo en valor a importancia de promover unha cultura empresarial que integre a responsabilidade social no seu modelo de xestión e sitúe as persoas no centro da actividade.

No acto —no que estivo acompañado pola secretaria xeral de Emprego e Relacións Laborais, Susana Pérez Iglesias; pola directora xeral de Traballo Autónomo e Economía Social, Marta Mariño; e pola directora xeral de Promoción da Igualdade, Eloína Ingerto— felicitou ás entidades premiadas nesta edición: Galaica Consultaría Integral e Nasas Social Media, na categoría de pequena empresa; Torres y Sáez, na de mediana empresa; Citanias Obras y Servicios, na de grande empresa; e Altia, coa Mención á Conciliación.

González destacou que estes galardóns permiten visibilizar empresas que, cumprindo xa co que establece a normativa, van un paso máis aló no seu día a día en aspectos como o benestar laboral, a conciliación e a corresponsabilidade, a igualdade de oportunidades, a diversidade ou a sustentabilidade ambiental. Cuestións que, segundo sinalou, contribúen a mellorar o clima laboral, favorecer a atracción e retención de talento e reforzar a competitividade e o futuro das organizacións.

O conselleiro reafirmou o compromiso da Xunta co tecido empresarial galego, especialmente coas pemes, para acompañalas no avance cara a formas de facer empresa máis responsables e sostibles. Neste ámbito, puxo en valor o programa Responsabilízate, que está a celebrar a súa quinta edición e do que xa se levan beneficiado máis de 700 empresas galegas. A iniciativa ofrece de forma gratuíta acompañamento e ferramentas para integrar a responsabilidade social na estratexia e na xestión diaria e conta tamén co Selo Responsabilízate, que distingue ás organizacións comprometidas coa responsabilidade social, a boa gobernanza e a sustentabilidade.

González animou ás empresas galegas a sumarse e lembrou que este venres se celebrará un webinar informativo no que se explicarán as características do programa e as vantaxes que ofrece ás empresas participantes.

Así mesmo, lembrou que a Xunta está a traballar na elaboración da nova Estratexia de Benestar Laboral, coa que se pretende seguir avanzando na integración do benestar das persoas traballadoras como unha prioridade das empresas.

Compromiso coa prevención e a saúde laboral

José González tamén situou o benestar laboral como un dos eixos do Plan integral para a mellora da prevención, o benestar laboral e a reincorporación saudable ao traballo en Galicia 2026-2029, acordado no marco do Diálogo Social con UGT-Galicia e a Confederación de Empresarios de Galicia.

O conselleiro destacou que o Plan é froito dun intenso traballo desenvolvido cos axentes sociais para abordar o impacto das baixas laborais en Galicia e que o seu enfoque non busca cuestionar en ningún caso os dereitos lexítimos das persoas traballadoras, senón evitar que estas cheguen a producirse ou evitar prolongacións innecesarias cando se deban a cuestións derivadas da xestión e non a unha xustificación médica dos profesionais sanitarios, posto que o criterio clínico, apuntou, será sempre prevalente.

O Plan atópase actualmente en tramitación administrativa e de dotación orzamentaria, coa previsión de elevalo este mes ao Consello da Xunta para a súa aprobación.